Survista
La retschertga da datas dal sectur da scola gida en emprima lingia a metter a disposiziun a la Confederaziun ed als chantuns ina basa da planisaziun e da decisiun en dumondas da la politica da furmaziun. La retschertga cumpiglia datas da basa individualas da tut las persunas en scolaziun da tut ils stgalims da furmaziun da la scolina fin a la scola auta; datas individualas dal persunal da scola da differents stgalims da furmaziun; sco er diploms dal stgalim secundar II e dal stgalim terziar. La retschertga da las datas vegn fatga mo en moda electronica.
Statisticas da la Confederaziun
La basa la pli impurtanta per tut las retschertgas da la statistica da furmaziun èn la Lescha federala davart la statistica federala (LStat; CS 431.01) e l'Ordinaziun davart la realisaziun da las retschertgas statisticas federalas (Ordinaziun davart las retschertgas statisticas; CS 431.012.1).
Protecziun da datas
La retschertga e l'elavuraziun da datas da persunas tras la statistica da furmaziun vegnan fatgas sa basond sin las disposiziuns da la Lescha federala davart la protecziun da datas (LPD; CS 235.1) e da la Lescha chantunala davart la protecziun da datas (LCPD; DG 171.100) sco er sin ulteriuras disposiziuns legalas chantunalas.
Numer d'assicuranza da la AVS
Datas individualas da persunas pon vegnir plausibilisadas en tut la Svizra mo, sch'ina identificaziun clera è pussaivla. En l'Ordinaziun federala davart las retschertgas statisticas vegn pervia da quai pretendì explicitamain il numer d'assicuranza da la AVS sco segn caracteristic d'identificaziun che sto vegnir endatà. Sia basa legala è l'art. 50e da la Lescha federala davart l'assicuranza per vegls e survivents (LAVS; CS 831.10). Per producir datas per statisticas vegnan anonimisadas las datas individualas.
Obligaziun da participaziun
Per las instituziuns da furmaziun publicas sco er privatas exista l'obligaziun da sa participar a las retschertgas prescrittas da la Confederaziun.
Segirezza: certificat
Noss certificats da server EV-SSL garanteschan che nossas paginas d'internet èn propi vegnidas fatgas da nus e ch'ellas sa chattan sin noss server d'internet. Questa garanzia As vegn mussada a maun d'ina designaziun correspundenta en la lingia d'adressa dal browser. Sch'i dat problems cun ils certificats, ha quai per il solit da far cun il fatg ch'il post da certificaziun vegn classifitgà sco betg fidà. Qua gidi ubain d'actualisar la software dal browser ubain da classifitgar la pagina d'internet sco pagina fidada (vesair l'instrucziun dal browser). Ans annunziai en cas da dubi il problem – nus empruvain d'As gidar vinavant.